JavaScript is not available.

റാഞ്ചി: ഝാർഖണ്ഡിൽ ഹേമന്ത് സോറന് മുഖ്യമന്ത്രിപദം ഒഴിയേണ്ടി വന്നാൽ അദ്ദേഹത്തിന്റെ ഭാര്യ കൽപന സോറൻ ( Kalpana Soren ) മുഖ്യമന്ത്രിയാകുമെന്ന് റിപ്പോർട്ടുകൾ. മുഖ്യമന്ത്രി പദം ദുരുപയോഗപ്പെടുത്തിയതിന് ഹേമന്ത് സോറനെ അയോഗ്യനാക്കാൻ തിരഞ്ഞെടുപ്പ് കമ്മീഷൻ ശുപാർശ ചെയ്തതായി രാജ്ഭവൻ വൃത്തങ്ങൾ വെളിപ്പെടുത്തുന്നു. ഹേമന്ത് സോറന് സ്ഥാനമൊഴിയേണ്ടിവന്നാൽ പകരം ഭാര്യ കൽപന സോറൻ ( Kalpana Soren ) മുഖ്യമന്ത്രി പദമേറുമെന്ന സൂചനയാണിപ്പോൾ ലഭിക്കുന്നത്.

മുഖ്യമന്ത്രി സ്വന്തം പേരിൽ സ്റ്റോൺ ചിപ്‌സ് ഖനി അനുവദിച്ച നടപടിക്കെതിരേ ബിജെപി ഗവർണ്ണർക്ക് പരാതി നൽകിയിരുന്നു. ഈ പരാതിയിലാണ് തിരഞ്ഞെടുപ്പു കമ്മിഷന്റെ അഭിപ്രായം ഗവർണ്ണർ രമേഷ് ബയ്‌സ് തേടിയത്. മുഖ്യമന്ത്രിയുടെ നിയമസഭാംഗത്വം റദ്ദു ചെയ്യാനാകുമെന്ന് കമ്മിഷൻ അറിയിച്ചതായാണ് വിവരം.

കൽപന സോറൻ സജീവ രാഷ്ട്രീയത്തിൽ നിന്ന് വിട്ടുനിൽക്കുകയാണെങ്കിലും പാർട്ടിയുടെ സ്ത്രീ ശാക്തീകരണ പരിപാടികളിൽ സ്ഥിരമായി പങ്കെടുക്കാറുണ്ട്. പൊതുവേദികളിൽ അപൂർവ്വമായി മാത്രം കാണുന്ന അവർ ഒരു സ്വകാര്യ സ്‌കൂൾ നടത്തുന്നു. ഒരു ബിസിനസ്സ് സംരംഭകയുമാണ്. സ്ത്രീകളെ ശാക്തീകരിക്കാൻ ശ്രമിക്കുന്ന പരിപാടികളിലും കുട്ടികൾക്കായി സംഘടിപ്പിക്കുന്ന പരിപാടികളിലും അവർ താൽപ്പര്യം പ്രകടിപ്പിക്കാറുണ്ട്. അത്തരം ചടങ്ങുകളിൽ സ്ഥിരമായി പ്രത്യക്ഷപ്പെടുന്നു.

2006 ഫെബ്രുവരി 7 ന് വിവാഹിതരായ കൽപനയും ഹേമന്ത് സോറനും രണ്ട് കുട്ടികളുടെ മാതാപിതാക്കളാണ്. ജാർഖണ്ഡ് മുഖ്യമന്ത്രി ഹേമന്ത് സോറനോട് അന്വേഷണ ഏജൻസികൾ ഏറെ അടുക്കുമ്പോൾ, അദ്ദേഹത്തിന്റെ ഭാര്യയാണ് സംസ്ഥാനത്തെ അടുത്ത മുഖ്യമന്ത്രി മുഖമാകാൻ ശ്രമിക്കുന്നതെന്ന് വൃത്തങ്ങൾ നൽകുന്ന സൂചന. ഒരു രാഷ്ട്രീയ കുടുംബത്തിലെ അംഗമായതിനാൽ, അവസരം ലഭിച്ചാൽ ജാർഖണ്ഡിലെ രാഷ്ട്രീയ സാഹചര്യം കൈകാര്യം ചെയ്യാൻ അവൾക്ക് കഴിയുമെന്ന് പലരും വിശ്വസിക്കുന്നു.

ആരാണ് കൽപ്പന സോറൻ?

ഒഡീഷയിലെ മയൂർഭഞ്ജിൽ നിന്നുള്ള ഒരു ബിസിനസ് കുടുംബത്തിലാണ് കൽപന ജനിച്ചത്. 1976-ൽ റാഞ്ചിയിൽ ജനിച്ച കൽപ്പന ഒരു സ്വകാര്യ സ്‌കൂളിൽ പഠിച്ച് റാഞ്ചിയിലെ സർക്കാർ കോളേജിൽ നിന്ന് ബിരുദം നേടി. 2006 ഫെബ്രുവരി 7 ന് അവർ ഹേമന്ത് സോറനെ വിവാഹം കഴിച്ചു, ദമ്പതികൾ രണ്ട് കുട്ടികളുടെ മാതാപിതാക്കളാണ്.

രാഷ്ട്രീയത്തിൽ സജീവമല്ലെങ്കിലും വിവാദങ്ങൾ കൽപ്പനയ്‌ക്കൊപ്പമുണ്ട്. ഭാര്യയുടെ ബിസിനസിനായി പ്ലോട്ട് അനുവദിക്കാൻ ഹേമന്ത് സോറൻ തന്റെ അധികാരം ദുരുപയോഗം ചെയ്തുവെന്ന് മുൻ മുഖ്യമന്ത്രിയും ബിജെപി നേതാവുമായ രഘുബർ ദാസ് നേരത്തേ ആരോപിച്ചിരുന്നു. വ്യവസായ മന്ത്രി എന്ന നിലയിൽ ഹേമന്ത് സോറൻ ആദിവാസികൾക്ക് വ്യവസായ സംരംഭങ്ങൾ തുടങ്ങാൻ വേണ്ടി സൃഷ്ടിച്ച പ്ലോട്ട് പൂളിൽ നിന്ന് കൽപനയ്ക്ക് 11 ഏക്കർ ഭൂമി അനുവദിച്ചതായാണ് ആരോപണം. രഘുവർ ദാസാണ് ഇക്കാര്യം വെളിപ്പെടുത്തിയത്.

റാഞ്ചിയിലെ ബാർഹെ ഇൻഡസ്ട്രിയൽ പാർക്കിൽ സൊഹ്രായി പ്രൈവറ്റ് ലിമിറ്റഡിന് ഇറച്ചി സംസ്‌കരണ യൂണിറ്റിനായാണ് സ്ഥലം അനുവദിച്ചത്. കൽപന സോറന്റെ ഉടമസ്ഥതയിലുള്ളതാണ് സൊഹ്രായ് പ്രൈവറ്റ് ലിമിറ്റഡ്. അഴിമതി നിരോധന നിയമത്തിലെ 13(2) വകുപ്പിന്റെ ലംഘനമാണ് ഭൂമി അനുവദിച്ചതെന്ന് ദാസ് ആരോപിച്ചിരുന്നു.

ഝാർഖണ്ഡിൽ മുഖ്യമന്ത്രി ഹേമന്ത് സോറന്റെ നിയമസഭാ അംഗത്വം റദ്ദാക്കാവുന്നതാണെന്നാണ് തെരഞ്ഞെടുപ്പ് കമ്മീഷൻ അറിയിച്ചിരിക്കുന്നതെന്നാണ് റിപ്പോർട്ടുകൾ. വിഷയത്തിൽ സോറന്റെ വിശദീകരണം തെരഞ്ഞെടുപ്പ് കമ്മീഷൻ തേടിയിരുന്നു. റിപ്പോർട്ടിന്റെ പശ്ചാത്തലത്തിൽ ഹേമന്ത് സോറൻ മുഖ്യമന്ത്രി പദവി രാജിവെച്ചേക്കുമെന്നും റിപ്പോർട്ടുകളുണ്ട്. ഝാർഖണ്ഡിൽ ജെഎംഎം-കോൺഗ്രസ് സഖ്യസർക്കാരിനെ അട്ടിമറിക്കാൻ ബിജെപി ശ്രമിക്കുന്നതായി ആരോപണം ഉയർന്നിരുന്നു.

ഹേമന്ത് സോറന്റെ അടുത്ത സഹായിയെന്ന് ആരോപിക്കപ്പെടുന്ന പ്രേം പ്രകാശിനെ അദ്ദേഹത്തിന്റെ വസതിയിൽ നിന്ന് രണ്ട് എകെ 47 തോക്കുകൾ കണ്ടെടുത്തതിന് തൊട്ടുപിന്നാലെ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) അറസ്റ്റ് ചെയ്തിരുന്നു . കള്ളപ്പണം വെളുപ്പിക്കൽ നിയമത്തിലെ വകുപ്പുകൾ പ്രകാരം റാഞ്ചിയിൽ നിന്നാണ് പ്രേം പ്രകാശിനെ അറസ്റ്റ് ചെയ്തത്. സംസ്ഥാനത്ത് അനധികൃത ഖനനം നടന്നതായി ആരോപിച്ച് കള്ളപ്പണം വെളുപ്പിക്കൽ അന്വേഷണത്തിന്റെ ഭാഗമായി ഝാർഖണ്ഡിലെ ഒന്നിലധികം സ്ഥലങ്ങളിൽ ബുധനാഴ്ച ഇഡി റെയ്ഡ് നടത്തി.

If Hemant Soren has to step down as Chief Minister of Jharkhand, Kalpana Soren will be the Chief Minister