JavaScript is not available.

കൊല്ലം: ആരോഗ്യമന്ത്രി വീണാ ജോര്‍ജിനെ വേദിയിലിരുത്തി ആയുര്‍വേദ ഡോക്ടര്‍മാരുടെ സംഘടനകള്‍ക്കെതിരേ രൂക്ഷ വിമര്‍ശം നടത്തി  പത്തനാപുരം എംഎൽഎ കെ.ബി.ഗണേഷ് കുമാർ.   പുരകത്തുമ്പോള്‍ വാഴവെട്ടാമെന്ന് കരുതിയിറങ്ങിയ അലവലാതികളാണ് സംഘടനാ നേതാക്കളെന്നായിരുന്നു എംഎല്‍എയുടെ പരാമര്‍ശം. കൊല്ലം, തലവൂര്‍ സര്‍ക്കാര്‍ ആയുര്‍വേദ ആശുപത്രിയുടെ കെട്ടിട ഉദ്ഘാടന ചടങ്ങിലായിരുന്നു ഗണേഷ് കുമാര്‍ വീണ്ടും ഡോക്ടര്‍മാര്‍ക്കെതിരേ രംഗത്തെത്തിയയത്.

സംഘടനാചുമതലയുളള ഡോക്ടര്‍മാരുടെ പേരുകള്‍ പറഞ്ഞ് ചില അലവലാതി ഡോക്ടർമാർ എനിക്കെതിരെ പറയുന്നത് കേട്ടു എന്നായിരുന്നു ഗണേഷ് കുമാറിന്റെ പരാമര്‍ശം.
.തന്റെ പുര കത്തിയാലും സാരമില്ല, ആ സമയം അപ്പുറത്ത് നില്‍ക്കുന്നവന്റെ വാഴവെട്ടി അടിക്കാം എന്ന് ചിന്തിക്കുന്ന ചില അലവലാതികളുണ്ട് അവരെയാണ് കൈകാര്യം ചെയ്യേണ്ടതെന്ന് ഗണേഷ് കുമാര്‍ പറഞ്ഞു. എന്നാല്‍ നേതാക്കളെ വിമര്‍ശിച്ചപ്പോഴും ആശുപത്രി ചീഫ് മെഡിക്കല്‍ ഓഫീസര്‍ക്കെതിരേ നടപടി എടുക്കരുതെന്ന് എംഎല്‍എ മന്ത്രിയോട് അഭ്യര്‍ഥിച്ചു.

‘സ്റ്റാഫിന്റെ പാറ്റേൺ ശരിയല്ലെന്നാണ് ഒരു നേതാവ് ടിവിയിൽ പറഞ്ഞത്. തലവൂർ ആയുർവേദ ആശുപത്രിക്കു വേണ്ടിയല്ല അയാൾ സംസാരിക്കുന്നത്. അയാൾക്ക് സ്റ്റാഫ് പാറ്റേൺ ശരിയാക്കിയാൽ മതി. 40 കിടക്കയുള്ള ആശുപത്രിയിൽ രണ്ടു പേരെ ഉള്ളൂവെന്നാണ് പറഞ്ഞത്. രണ്ടു പേർ ഉണ്ടായിരുന്നു, ഒരാൾ പോയതാണ്. പേ വാർഡിനായി ഒരു സ്വീപ്പറെതന്നെ ഇവിടെ കൊടുത്തിട്ടുണ്ട്.

ബാക്കിയുള്ളവരെ എടുക്കുന്നതിനായി എച്ച്എംസിയിൽ 10 പേരുടെ ലിസ്റ്റ് ഇട്ടിട്ടുണ്ട്. ഇവിടെ നാലായി വിഭജിച്ച് നാലു പേരെവച്ച് വൃത്തിയാക്കുകയാണ് വേണ്ടത്. ഇതിന് എച്ച്എംസിയിൽനിന്ന് ഇവർക്ക് ആളെ എടുക്കാം. അത് എടുക്കാത്തത് ആരുടെ തെറ്റാണ്? ബാത്ത്റൂമിൽ ടൈൽ ഇളകിയെന്നാണ് അയാൾ പിന്നെ പറയുന്നത്. ഇവിടെ ബാത്ത്റൂമിൽ ടൈലൊന്നും ഇളകിയിട്ടില്ല. ക്ലോസറ്റിന്റെ മുകൾഭാഗം പൊട്ടിയിട്ടുണ്ട്. അതു ഡോക്ടർ കാണാത്തതുകൊണ്ടും അത് മാറ്റാത്തതിലുമുള്ള രോഷമാണ് പ്രകടിപ്പിച്ചത്.

അല്ലാതെ ഇവിടെ ടൈൽസ് ഒന്നും പൊട്ടിയിട്ടില്ല. സിനിമാനടനായ എന്റെ വീട്ടിൽ ഇട്ടിരിക്കുന്നതിലും നല്ല ടൈൽസാണ് ഇവിടെ ഇട്ടിരിക്കുന്നത്. ഇവിടുത്തെ സിഎംഒയെ ഞാൻ സഹോദരിയെ പോലെയാണ് കാണുന്നത്. അത് അവർക്കും അറിയാം. അതുകൊണ്ടാണ് പറഞ്ഞത്. ഞാൻ പറഞ്ഞതിൽ അവർക്ക് പരാതിയും ഇല്ല.’– ഗണേഷ് പറഞ്ഞു. 

ഒരാഴ്ച മുന്‍പ് തലവൂര്‍ ആയുര്‍വേദ ആശുപത്രി എംഎല്‍എ സന്ദര്‍ശിക്കുകയും വൃത്തിഹീനമായതിന് ഡോക്ടര്‍മാരെ വിമര്‍ശിക്കുകയും ചെയ്തിരുന്നു. നിര്‍മാണം നടക്കുന്ന ആശുപത്രിയുടെ ഉള്‍വശം വൃത്തിഹീനമായി അലങ്കോലപ്പെട്ട് കാണാനിടയായതിനെത്തുടര്‍ന്നായിരുന്നു കെ.ബി.ഗണേഷ് കുമാര്‍ എം.എല്‍.എ. ആശുപത്രി ജീവനക്കാരെയും ഡോക്ടര്‍മാരെയും പരസ്യമായി ശകാരിച്ചത്. ഇതിനെതിരെ ഡോക്ടര്‍മാരുടെ സംഘടനകള്‍ ആരോഗ്യമന്ത്രിക്ക് പരാതി നല്‍കിയിരുന്നു.

മൂന്നുകോടിയോളം രൂപ മുടക്കിയ ആശുപത്രി വൃത്തിയായി സൂക്ഷിക്കാത്ത ജീവനക്കാര്‍ക്കുമുന്നില്‍ ചൂലെടുത്ത് തൂത്തും തറതുടച്ചും ചിലന്തിവലയടിച്ചും എം.എല്‍.എ. രോഷം പ്രകടിപ്പിച്ചിരുന്നു. ഉദ്ഘാടനത്തിനു മുന്നോടിയായി സ്ഥിതിഗതികള്‍ വിലയിരുത്താനും വികസനദൃശ്യങ്ങള്‍ പകര്‍ത്താനുമായി പ്രാദേശിക ചാനല്‍ പ്രവര്‍ത്തകരുമായി ആശുപത്രിയില്‍ എത്തിയതായിരുന്നു എം.എല്‍.എ. ഗ്രാമപ്പഞ്ചായത്തിനെയും ആശുപത്രി ജീവനക്കാരെയും മുന്‍കൂട്ടി അറിയിച്ചായിരുന്നു എം.എല്‍.എയുടെ സന്ദര്‍ശനം.

K B Ganesh Kumar against ayurveda doctors


Visum Expresso ഫേസ്ബുക് പേജ്  സബ്സ്ക്രൈബ് ചെയ്യുന്നതിന്  ക്ലിക് ചെയ്യു   https://www.facebook.com/VISUM-Expresso-LLP-101011348734582
Visum Expresso ട്വിറ്റെർ അക്കൗണ്ട് ഫോലോ ചെയ്യാൻ   ക്ലിക് ചെയ്യു   https://twitter.com/VisumExpresso