JavaScript is not available.

ടൊറന്റോ :  കാനഡ-യു.എസ്  അതിര്‍ത്തിക്ക് സമീപം മരവിച്ചു  മരിച്ച നിലയില്‍ കണ്ടെത്തിയ ഇന്ത്യന്‍ കുടുംബത്തെ തിരിച്ചറിഞ്ഞു . ഗുജറാത്തിലെ ഗാന്ധിനഗറിലെ കലോൽ തഹസിൽ ഡിങ്കുച ഗ്രാമത്തിലെ താമസക്കാരാണെന്ന് തിരിച്ചറിഞ്ഞതായി  ഒട്ടാവയിലെ ഇന്ത്യൻ ഹൈക്കമ്മീഷൻ പുറത്തിറക്കിയ പ്രസ്താവനയിൽ   വെള്ളിയാഴ്ച രാവിലെ അറിയിച്ചു.  ജഗദീഷ് പട്ടേൽ (39), ഭാര്യ വൈശാലി പട്ടേൽ (37), ഇവരുടെ മകൾ വിഹാംഗി പട്ടേൽ (11), മകൻ ധാർമിക പട്ടേൽ (3) എന്നിവരാണ് മരിച്ചത്.

ജനുവരി 19-നാണ് യുഎസ്-കാനഡ അതിര്‍ത്തിയില്‍ നിന്ന് 12 മീറ്റര്‍ മാത്രം അകലെയുള്ള മോണിറ്റോബയില്‍ മരിച്ചനിലയില്‍ ഇവരെ കണ്ടെത്തിയത്.  ജനുവരി 26നാണ് ഇവരുടെ മൃതദേഹ പരിശോധന പൂര്‍ത്തിയായത്. കഠിനമായ ശൈത്യത്തെ തുടര്‍ന്ന് ഇവര്‍ തണുത്ത് മരവിച്ച് മരണപ്പെട്ടതാണെന്നാണ് പരിശോധനയില്‍ കണ്ടെത്തിയത്.  

രണ്ടാഴ്ച മുന്‍പാണ് സന്ദര്‍ശക വിസയില്‍ കുടുംബം കാനഡയിലേക്ക് എത്തിയതെന്ന് അധികൃതര്‍ പറഞ്ഞു. ഇവരെ മരണപ്പെട്ട നിലയില്‍ കണ്ടെത്തിയതിന് സമീപത്തൊന്നും വാഹനങ്ങളൊന്നും കണ്ടെത്തിയിട്ടില്ല. ഇവരെ മനുഷ്യക്കടത്ത് സംഘം മറ്റേതോ വാഹനത്തില്‍ അതിര്‍ത്തിക്ക് സമീപം ഇറക്കിവിട്ടതാവാമെന്നാണ് കരുതുന്നത്. ഇത് സംബന്ധിച്ച് കൂടുതല്‍ അന്വേഷണങ്ങള്‍ നടക്കുകയാണെന്നും പോലീസ് പറഞ്ഞു.  

ജനുവരി 19ന്, റോയല്‍ കനേഡിയന്‍ മൗണ്ടഡ് പോലീസ് (ആര്‍സിഎംപി) കാനഡയിലെ എമേഴ്സണ്‍ നഗരത്തിന് സമീപം തണുത്ത് മരവിച്ച് മരിച്ച നിലയില്‍ നാല് മൃതദേഹങ്ങള്‍ കണ്ടെത്തുകയായിരുന്നു. അന്നുതന്നെയാണ് രേഖകളില്ലാത്ത രണ്ട് ഇന്ത്യന്‍ പൗരന്മാരെ തന്റെ വാഹനത്തില്‍ അനധികൃതമായി കടത്താന്‍ ശ്രമിച്ചതിന് അമേരിക്കക്കാരനായ സ്റ്റീവ് ഷാന്‍ഡ് എന്നയാളെ എന്‍ഫോഴ്സ്മെന്റ് ഏജന്‍സികള്‍ അറസ്റ്റ് ചെയ്തതായും റിപ്പോര്‍ട്ടുകളുണ്ടായിരുന്നു.  നുഴഞ്ഞുകയറാന്‍ ശ്രമിച്ചുവെന്നാരോപിച്ച് രേഖകളില്ലാത്ത അഞ്ച് ഇന്ത്യന്‍ പൗരന്മാരെക്കൂടി യുഎസ് പൊലീസ് കസ്റ്റഡിയിലെടുത്തിരുന്നു. ഈ ഏഴ് പേരും മരിച്ച നിലയില്‍ കണ്ടെത്തിയ നാല് പേരും ഒരേ സംഘത്തില്‍ പെട്ടവരാണെന്നാണ് പോലീസ് നിഗമനം. 

 കുടുംബം അനധികൃതമായി യുഎസിലേക്ക് പ്രവേശിക്കാൻ ശ്രമിക്കുമ്പോൾ ആണ് കഠിനമായ ശൈത്യത്തെ തുടർന്ന് മരവിച്ചു മരിച്ചത് എന്നനിഗമനത്തിലാണ് അധികൃതർ . പക്ഷെ അവർ എന്തിനാണ് വണ്ടിയിൽ നിന്ന് പുറത്തു ഇറങ്ങിയത് എന്ന് വ്യക്തമായിട്ടില്ല .അതോ മനുഷ്യ കടത്തുകാർ അവരെ ഇറക്കി  വിട്ടതാണോ എന്നും സംശയം ഉണ്ട് . തണുപ്പ് കൂടുതൽ ഉള്ള സമയങ്ങളിൽ ഉദ്യോഗസ്ഥരുടെ കണ്ണ് വെട്ടിച്ചു അതിര്‍ത്തിക്ക് സമീപം ഇറക്കി വിട്ടു അവിടെ നിന്ന് നടന്നാണ് ആളുകൾ അതിര്‍ത്തി കടക്കുന്നത് എന്നാണ് മുൻപ് അറസ്റ്റിലായ പലരും വെളിപ്പെടുത്തിയത്  .  ഇന്ത്യൻ കുടുംബത്തിന്റെ  കൂടെ ഉണ്ടായിരുന്നവർ എന്ന് സംശയിക്കുന്നവരെ വണ്ടിയിൽ നിന്നാണ് അറസ്റ്റ് ചെയ്തത് . അവരെ ചോദ്യം ചെയ്തു വരുകയാണ് . അതിൽ ഒരാളുടെ കൈ ഭാഗികമായി തണുത്തു ഉറഞ്ഞു പോയി എന്നും മുറിച്ചു മാറ്റേണ്ടി വരും എന്നും അധികൃതർ കോടതിയിൽ ഹാജരാക്കിയപ്പോൾ  അറിയിച്ചു 

കുടുംബനാഥനായ ജഗദീഷ് മുമ്പ് സ്‌കൂൾ അധ്യാപകനായി ജോലി ചെയ്യുകയും കലോൽ എന്ന സ്ഥലത്തു  വിവിധ ബിസിനസ്സുകൾ നടത്തുകയും ചെയ്‌തിരുന്നു. ജഗദീഷിന്റെ പിതാവ് ബൽദേവ് പട്ടേലും ഗ്രാമം വിട്ടുപോയതിനാൽ ഡിങ്കുച്ചയിൽ കുടുംബത്തിന് ഉള്ള   വീട് പൂട്ടികിടക്കുയാണ് . സന്ദർശക വിസയിൽ കുടുംബം രണ്ടാഴ്ച മുമ്പ് ആണ് കാനഡയിലേക്ക് എത്തിയത് എന്ന്  അധികൃതർ പറഞ്ഞു.

കുടുംബത്തിന്റെ ദാരുണമായ മരണവിവരം ഗുജറാത്തിലെ കുടുംബാംഗങ്ങളെ അറിയിച്ചിട്ടുണ്ടെന്നും മൃതദേഹം ഇന്ത്യയിലേയ്ക്ക് എത്തിക്കുന്നതിനുള്ള എല്ലാ നടപടികളും പൂര്‍ത്തിയാക്കി വരികയാണെന്നും കാനഡയിലെ ഇന്ത്യന്‍ കോണ്‍സുലേറ്റ് വാര്‍ത്താക്കുറിപ്പില്‍ അറിയിച്ചു. സംഭവത്തില്‍ ദുഃഖം രേഖപ്പെടുത്തുന്നുവെന്നും എല്ലാവിധ സഹായങ്ങളും കുടുംബത്തിന് ഉറപ്പുവരുത്തുമെന്നും വാര്‍ത്താക്കുറിപ്പില്‍ പറയുന്നുണ്ട്. 


Indian family that froze to death near US-Canada border identified