JavaScript is not available.

താമരശ്ശേരി (കോഴിക്കോട്)∙ പി.വി.അൻവർ എംഎൽഎയും കുടുംബവും ഭൂപരിധി ചട്ടം ലംഘിച്ച് അധിക ഭൂമി കൈവശംവച്ചെന്ന പരാതിയില്‍ ഭൂമി സംബന്ധമായ രേഖകൾ ഫെബ്രുവരി 15ന് താമരശ്ശേരി താലൂക്ക് ലാൻഡ് ബോർഡ് യോഗത്തിൽ ഹാജരാക്കണം. വ്യാഴാഴ്ച നടന്ന ലാൻഡ് ബോർഡ് യോഗത്തിൽ പി.വി.അൻവർ എംഎൽഎയ്‌ക്കു വേണ്ടി ഹാജരായ അഭിഭാഷകൻ രേഖകൾ ഹാജരാക്കാൻ ഒരു മാസം സാവകാശം ചോദിച്ചതിനെ തുടർന്നാണ് 15ന് ഹാജരാക്കാൻ നിർദേശിച്ചത്.

അധിക ഭൂമി സംബന്ധിച്ച പരാതിയെ തുടർന്ന് റവന്യു വകുപ്പ് നടത്തിയ അന്വേഷണത്തിൽ മലപ്പുറം ജില്ലയിൽ ഏറനാട് താലൂക്ക് പരിധിയിൽ പെരകമണ്ണ (1.2715), തൃക്കലങ്ങോട് (6.9908), കോഴിക്കോട് ജില്ലയിലെ താമരശ്ശേരി താലൂക്ക് പരിധിയിലെ കൂടരഞ്ഞി (14.5569) വില്ലേജുകളിലായി 22.8192 ഏക്കർ സ്ഥലം പി.വി. അൻവറിനും കുടുംബത്തിനും കൈവശമുണ്ടെന്നു കണ്ടെത്തിയതിനെ തുടർന്നാണ് താലൂക്ക് ലാൻഡ് ബോർഡ് യോഗത്തിൽ ഹാജരാവാൻ നോട്ടിസ് നൽകിയത്.

രേഖകൾ പരിശോധിച്ച് പരിധിയിൽ കവിഞ്ഞ ഭൂമി കൈവശമുള്ളതായി കണ്ടെത്തിയാൽ നിയമാനുസൃതം അധിക ഭൂമി ഏറ്റെടുക്കുമെന്ന് താമരശ്ശേരി താലൂക്ക് ലാൻഡ് ബോർഡ് ചെയർമാൻ ഡപ്യുട്ടി കലക്ടർ പി.അൻവർ സാദത്ത് പറഞ്ഞു. വിവരാവകാശ കൂട്ടായ്മ സംസ്ഥാന കോ-ഓർഡിനേറ്റർ മലപ്പുറം ചേലമ്പ്ര സ്വദേശി പുല്ലിപ്പറമ്പ് കെ.വി.ഷാജിയുടെ പരാതി പ്രകാരം സ്റ്റേറ്റ് ലാൻഡ് ബോർഡിന്റെ നിർദേശത്തെത്തുടർന്നാണ് താമരശ്ശേരി താലൂക്ക് ലാൻഡ് ബോർഡ് നടപടി ആരംഭിച്ചത്.

2017ൽ നൽകിയ പരാതിയിൽ നടപടി ഉണ്ടാവാത്തതിനെ തുടർന്ന് 2021ൽ ഹൈക്കോടതിയെ സമീപിച്ച്, ആറു മാസത്തിനുള്ളിൽ നടപടി സ്വീകരിക്കാൻ ഉത്തരവ് നേടിയിരുന്നു. ഈ ഉത്തരവും നടപ്പിലാക്കാത്ത സാഹചര്യത്തിൽ പരാതിക്കാരൻ കോടതി അലക്ഷ്യത്തിനു കേസ് ഫയൽ ചെയ്തോടെ അഞ്ച് മാസത്തിനുള്ളിൽ നടപടി സ്വീകരിക്കാൻ കോടതി ഉത്തരവ് നൽകിയതിനെ തുടർന്നാണ് റവന്യു വകുപ്പ് പരിശോധ നടത്തിയത്.

തിരഞ്ഞെടുപ്പ് സത്യവാങ്മൂലം തയ്യാറാക്കുമ്പോഴുണ്ടായ പിഴവാണ് ആശയക്കുഴപ്പിന് കാരണമെന്നും ഇത് ലാന്‍ഡ് ബോര്‍ഡിനെ ബോധിപ്പിക്കുമെന്നും പിവി അന്‍വറിന്റെ അഭിഭാഷകനും ബന്ധുവും പറഞ്ഞു. എന്നാല്‍ സമയംനീട്ടി നല്‍കി സര്‍ക്കാര്‍ എംഎല്‍എയെ സഹായിക്കുകയാണെന്നാണ് പരാതിക്കാര്‍ പറയുന്നത്. 

റവന്യു വകുപ്പ് കണ്ടെത്തിയതിനെക്കാൾ കൂടുതൽ ഭൂമി അൻവറിന്റെയും കുടുബത്തിന്റെയും പക്കൽ ഉണ്ടന്നും ഇതിനാവശ്യമായ തെളിവുകൾ ലാൻഡ് ബോർഡ് യോഗത്തിൽ ഹാജരക്കുമെന്നും പരാതിക്കാനായ കെ.വി.ഷാജി പറഞ്ഞു..


Complaint of possession of land exceeding the limits of PV Anwar MLA