JavaScript is not available.

മലപ്പുറം: കരിപ്പൂരിൽ വീണ്ടും സ്വർണവേട്ട. വിമാനത്താവളത്തിൽ കസ്റ്റംസിനെ വെട്ടിച്ച് പുറത്തെത്തിച്ച സ്വർണം പോലീസാണ് പിടികൂടിയത്. താനാളൂർ സ്വദേശി നിസാമുദ്ദീനാണ് പോലീസിന്റെ പിടിയിലായത്. കഴിഞ്ഞ ദിവസം രാത്രി എയർപോർട്ട് പരിസരത്ത് വെച്ചാണ് നിസാമുദ്ദീനെ പിടികൂടിയത്. ഇയാളിൽ നിന്നും 88 ലക്ഷം രൂപ വില വരുന്ന 1.783 കിലോ സ്വർണ്ണം പിടിച്ചെടുത്തു.

ഞായറാഴ്ച രാത്രി 09:30 ഓടെയാണ് നിസാമുദ്ദീൻ ദമാമിൽ നിന്ന് ഇൻഡിഗോ ഫ്ലൈറ്റിൽ ( Flight No.6E 1366) കരിപ്പൂർ വിമാനത്താവളത്തിൽ വന്നിറങ്ങിയത്. കസ്റ്റംസ് പരിശോധന കഴിഞ്ഞ് കള്ളക്കടത്ത് സ്വർണ്ണവുമായി അനായാസം പുറത്തിറങ്ങിയ നിസാമുദ്ദീനെ പോലീസ് കസ്റ്റഡിയിലെടുക്കുകയായിരുന്നു. മലപ്പുറം ജില്ലാ പോലീസ് മേധാവിക്ക് ലഭിച്ച രഹസ്യ ഇൻറലിജൻസ് റിപ്പോർട്ടിനെ തുടർന്ന് നിസാമുദ്ദീനു വേണ്ടി എയർപോർട്ട് പരിസരത്ത് പോലീസ് നേരത്തേ നിലയുറപ്പിച്ചിരുന്നു.

ഇയാളെ സ്വീകരിക്കാൻ അയൽവാസികളും സുഹൃത്തുക്കളുമായ രണ്ടുപേർ ഓട്ടോയിൽ എത്തിയിരുന്നു. എന്നാൽ ഇവർക്ക് കള്ളക്കടത്തിനെ കുറിച്ച് അറിവുണ്ടായിരുന്നില്ല എന്നാണ് പോലീസ് പറയുന്നത്. വിശദമായി ചോദ്യം ചെയ്തതിൽ സ്വന്തം ലഗ്ഗേജിലാണ് സ്വർണ്ണമുള്ളതെന്ന് നിസാമുദ്ദീന് സമ്മതിക്കേണ്ടി വന്നു. ലഗ്ഗേജിൽ നിന്നും ഒരു മിക്സിയും പോലീസ് കണ്ടെത്തി. മിക്സിയുടെ മോട്ടോറിനുള്ളിലെ ആർമേച്ചർ കോയിലിനകത്തെ മാഗ്നറ്റ് എടുത്ത് മാറ്റി പകരം അതിനുള്ളിൽ അതിവിദഗ്ദമായി ഒളിപ്പിച്ച നിലയിൽ സ്വർണ്ണം കണ്ടെത്തി. ഇത് പുറത്തെടുക്കാൻ ഏറെ പരിശ്രമിക്കേണ്ടി വന്നു.

സ്വർണം ഉരുക്കി ആർമേച്ചർ കോയിലിനകത്തെ മാഗ്നറ്റിന്റെ രൂപത്തിൽ ആക്കിയിരുന്നു. പുറത്തെടുത്ത സിലിണ്ടർ രൂപത്തിലുള്ള സ്വർണ്ണ കട്ടിക്ക് 1.783 കിലോ തൂക്കമുണ്ട്. നിസാമുദ്ദീനെ വിശദമായി ചോദ്യം ചെയ്ത് വരികയാണ്. ഇയാളുടെ ഫോൺ പരിശോധിച്ച് കള്ളക്കടത്തിന് പിന്നിൽ ഉള്ളവരെ കൂടി തിരിച്ചറിയാനും സംഘത്തിലെ മുഴുവൻ പേരെയും നിയമത്തിന് മുമ്പിൽ കൊണ്ട് വരാനുമുള്ള ശ്രമം തുടരുകയാണ് എന്ന് പോലീസ് അറിയിച്ചു. കഴിഞ്ഞ മൂന്നര മാസത്തിനിടെ കരിപ്പൂർ വിമാനത്താവളത്തിന് പുറത്തു നിന്ന് പോലീസ് പിടികൂടുന്ന 46ാമത്തെ സ്വർണ്ണ കള്ളക്കടത്ത് കേസാണിത്.

Police Seized 88 lakh gold at Karipur