JavaScript is not available.

കൊച്ചി: കെ റെയിൽ അതിവേഗപ്പാത സംബന്ധിച്ച വിവാദം തുടരുന്നതിനിടെ ഇന്ത്യൻ റെയിൽവേയുടെ സെമി ഹൈസ്പീഡ് തീവണ്ടിയായ വന്ദേ ഭാരത് എക്സ്പ്രസ് കേരളത്തിൽ സര്‍വീസ് തുടങ്ങുമെന്ന് റിപ്പോര്‍ട്ടുകള്‍. തിരുവനന്തപുരം ഡിവിഷനിൽ നിന്ന് വന്ദേ ഭാരത് സര്‍വീസ് ആരംഭിക്കാനായി റെയിൽവേ ഒരുക്കങ്ങള്‍ തുടങ്ങിയെന്നാണ് റിപ്പോര്‍ട്ടുകള്‍. 1126 യാത്രക്കാ‍ര്‍ക്ക് സഞ്ചരിക്കാവുന്ന രണ്ട് റേക്കുകള്‍ക്കാണ് റെയിൽവേ അനുമതി നല്‍കിയതെന്നാണ്  റിപ്പോര്‍ട്ട്.

16 പാസഞ്ചര്‍ കാറുകള്‍ അടങ്ങുന്ന രണ്ട് റേക്കുകള്‍ നിര്‍ത്തിയിടാനും അറ്റകുറ്റപ്പണികള്‍ നടത്താനുമുള്ള സംവിധാനം ഒരുക്കണമെന്നാണ് റെയിൽവേ ബോര്‍ഡിൻ്റെ നിര്‍ദേശം. അതേസമയം, പുതിയ ട്രെയിനിൻ്റെ റൂട്ടും സമയക്രമവും സംബന്ധിച്ച് വ്യക്തതയില്ല. 2023 ഓഗസ്റ്റിനു മുൻപ് 75 വന്ദേ ഭാരത് ട്രെയിനുകള്‍ സര്‍വീസ് തുടങ്ങാനാണ് റെയിൽവേയുടെ പദ്ധതി.

ഇന്ത്യ തദ്ദേശീയമായി വികസിപ്പിച്ച ആദ്യ സെമി ഹൈസ്പീഡ് ട്രെയിനായ വന്ദേ ഭാരത് എക്സ്പ്രസിന് 180 കിലോമീറ്ററാണ് പരമാവധി വേഗം ആര്‍ജിക്കാൻ കഴിയുക. എന്നാൽ ട്രാക്കിൻ്റെ പരിമിതികള്‍ മൂലം നിലവിൽ സര്‍വീസ് നടത്തുന്ന പാതയിൽ ഒരിടത്തും 130 കിലോമീറ്ററിലധികം വേഗം കൈവരിക്കാൻ സാധിച്ചിട്ടില്ല. മണിക്കൂറിൽ 200 കിലോമീറ്റര്‍ പാതയിൽ ട്രെയിൻ ഓടിക്കാൻ സാധിക്കുന്ന പുതിയ ഗ്രീൻഫീൽഡ് ട്രാക്കാണ് കെ റെയിൽ തയ്യാറാക്കാൻ പദ്ധതിയിടുന്നത്. മെട്രോ കോച്ചുകള്‍ക്ക് സമാനമായ സാങ്കേതികവിദ്യയുള്ള വന്ദേ ഭാരത് എക്സ്പ്രസ് എത്തിച്ചാലും കേരളത്തിലെ പരിമിതമായ ട്രാക്കിൽ യാത്രാസമയത്തിൽ കാര്യമായ വ്യത്യാസം വരാനിടയില്ല. എന്നാൽ വേഗതയിൽ കുറവുണ്ടായാലും കേരളത്തിലൂടെ വന്ദേ ഭാരത് ട്രെയിൻ സര്‍വീസ് നടത്തണമെന്നാണ് റെയിൽവേ മന്ത്രാലയത്തിൻ്റെ തീരുമാനം. കേരളത്തിൽ നിന്നെത്തിയ ബിജെപി നേതാക്കള്‍ക്ക് കേന്ദ്ര റെയിൽവേ മന്ത്രി അശ്വിനി വൈഷ്ണവ് ഇതുസംബന്ധിച്ച് ഉറപ്പു നല്‍കുകയും ചെയ്തിരുന്നുവെന്ന് റിപ്പോര്‍ട്ടിൽ പറയുന്നു.


അതേസമയം, വന്ദേ ഭാരത് ട്രെയിനുകൾ കെ റെയിൽ സിൽവർലൈൻ പദ്ധതിയ്ക്ക് പകരമാകില്ലെന്ന് കെ റെയിൽ കോർപ്പറേഷൻ മുൻപ് വ്യക്തമാക്കിയിരുന്നു. കേരളത്തിൽ ചുരുക്കം ചില സ്ഥലങ്ങളിൽ മാത്രമാണ് മണിക്കൂറുകളിൽ 80 മുതൽ 110 കിലോമീറ്റർ വരെ വേഗതയിൽ ട്രെയിൻ ഓടിക്കാൻ സാധിക്കുന്നത്. നിലവിൽ കേരളത്തിലോടുന്ന വേഗമേറിയ ട്രെയിനുകളിലൊന്നായ ജനശതാബ്ദിയെ അപേക്ഷിച്ച് 10 ശതമാനത്തിലധികം വേഗതയാർജിക്കാൻ വന്ദേ ഭാരതിന് കഴിഞ്ഞേക്കില്ലെന്നും കെ റെയിൽ കോർപ്പറേഷൻ വ്യക്തമാക്കുന്നു

ചെന്നൈ ഇന്‍റഗ്രൽ കോച്ച് ഫാക്ടറിയിൽ തയ്യറാക്കുന്ന ട്രെയിനുകളിൽ ഒന്നിൻ്റെ നിര്‍മാണം ഈ വര്‍ഷം ഓഗസ്റ്റിൽ പൂര്‍ത്തിയാകും. അടുത്ത വര്‍ഷം ഓഗസ്റ്റിനു മുൻപായി തിരുവനന്തപുരം ഡിവിഷന് രണ്ട് ട്രെയിനുകള്‍ ലഭിക്കുമെന്നാണ് കരുതപ്പെടുന്നത്. കേരളത്തിനു പുറമെ ദക്ഷിണ റെയിൽവേയിൽ ചെന്നൈ ഡിവിഷന് ആറും കോയമ്പത്തൂരിന് മൂന്നും തിരുച്ചിറപ്പള്ളിയ്ക്ക് രണ്ടും റേക്കുകള്‍ വീതം അനുവദിക്കും. ഇവിടങ്ങളിലെല്ലാം ട്രെയിനുകളുടെ പരിപാലനത്തിന് ആവശ്യമായ സൗകര്യങ്ങള്‍ ഒരുക്കാൻ റെയിൽവേ നിര്‍ദേശിച്ചിട്ടുണ്ട്.

അതേസമയം, കടുത്ത പ്രതിഷേധത്തിനിടയിലും സിൽവര്‍ലൈൻ പദ്ധതിയുടെ സാമൂഹികാഘാത പഠനത്തിനായി കല്ലിടൽ പുരോഗമിക്കുകയാണ്. പദ്ധതിയ്ക്കായി കെ റെയിൽ തയ്യാറാക്കിയ ഡിപിആറിന് കേന്ദ്ര റെയിൽവേ മന്ത്രാലയം ഇനിയും അനുമതി നല്‍കിയിട്ടില്ല.

Amid k rail protest ndian irailway ministry decides to give vande bharat trains to kerala

Visum Expresso ഫേസ്ബുക് പേജ്  സബ്സ്ക്രൈബ് ചെയ്യുന്നതിന്  ക്ലിക് ചെയ്യു  
Visum Expresso ട്വിറ്റെർ അക്കൗണ്ട് ഫോലോ ചെയ്യാൻ   ക്ലിക് ചെയ്യു