JavaScript is not available.

കണ്ണൂർ: എൽഡിഎഫ് ഭരിക്കുമ്പോൾ ഒന്നും നടക്കരുതെന്നാണ് പ്രതിപക്ഷത്തിന്റെ വാശിയെന്ന് മുഖ്യമന്ത്രി പിണറായി വിജയൻ. യുഡിഎഫ് ഭരിക്കുമ്പോൾ അതിവേഗ റെയിൽ ആകാം. എന്നാൽ എൽഡിഎഫ് ചെയ്യുമ്പോൾ പാടില്ലെന്ന അവസ്ഥയാണുള്ളതെന്നും പിണറായി പറഞ്ഞു. പാർട്ടി കോൺഗ്രസ് സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം.

ഒരു പദ്ധതി വരുമ്പോൾ അത് നാടിനുവേണ്ടിയുള്ളതാണെന്ന് ഓർക്കണം. അതിനെ തടയാൻ ശ്രമിക്കുകയല്ല വേണ്ടതെന്നും പിണറായി പറഞ്ഞു. കെ റെയിൽ പദ്ധതിക്ക് അനുമതി ലഭിക്കുമെന്നാണ് പ്രതീക്ഷിക്കുന്നത്. പ്രശ്നങ്ങൾ പ്രശ്നമായി ഉന്നയിക്കുകയാണ് വേണ്ടത്. അല്ലാതെ അന്ധമായി എതിർക്കുകയല്ല വേണ്ടത്.

വികസനത്തിന് എതിരു നിൽക്കുന്നവരെ തുറന്നു കാണിക്കുന്നതിനു പകരം ചില മാധ്യമങ്ങൾ ഒപ്പം ചേരുകയാണ്. അവർക്കു വേണ്ടി വാദിക്കുകയാണ്. എന്നാൽ ഒന്നും നടക്കുന്നില്ലെന്നും പിണറായി പറഞ്ഞു. പരിസ്ഥിതി പ്രശ്നമാണ് ചിലർ പറയുന്നത്. എന്നാൽ കെ റെയിൽ വരുമ്പോൾ കാർബൺ ബഹിർഗമനം കുറയുകയാണ് ചെയ്യുന്നതെന്നും മുഖ്യമന്ത്രി പറഞ്ഞു. പ്രകടന പത്രിക വെറും വാക്കല്ല. ജനങ്ങൾക്കു കൊടുത്ത വാക്കാണ്. എന്തു വിലകൊടുത്തും പദ്ധതി നടപ്പാക്കുമെന്ന് പിണറായി വ്യക്തമാക്കി.

അതേസമയം പാർട്ടി കോൺഗ്രസ് സമാപന സമ്മേളനത്തിൽ കോൺഗ്രസിനെതിരെ പാർട്ടി ജനറൽ സെക്രട്ടറി സീതാറാം യെച്ചൂരി രൂക്ഷ വിമർശനമാണ് ഉന്നയിച്ചത്. ഇന്ത്യൻ രാഷ്ട്രീയത്തിൽ എവിടെയെത്തി നിൽക്കുന്നുവെന്ന് കോൺഗ്രസ് സ്വയം ചിന്തിക്കണമെന്ന് അദ്ദേഹം പറഞ്ഞു.

ഏകാധിപത്യ സർക്കാരിനെതിരെയുള്ള സെമിനാറിൽ പോലും പങ്കെടുക്കാൻ സാധിക്കാത്ത അവസ്ഥയിലാണ് കോൺഗ്രസ്. ഒരു സെമിനാറിനു വിളിച്ചാൽ പോലും വരില്ലെന്നാണ് ചിലരുടെ നിലപാട്. മതനിരപേക്ഷ പാർട്ടി എന്ന പേര് മാത്രമാണ് അവർക്കുള്ളത്. സെമിനാറിൽ പങ്കെടുത്തവർക്കെതിരെ അവർ നടപടിയെടുക്കുകയാണെന്നും യെച്ചൂരി കുറ്റപ്പെടുത്തി.

Visum Expresso ഫേസ്ബുക് പേജ്  സബ്സ്ക്രൈബ് ചെയ്യുന്നതിന്  ക്ലിക് ചെയ്യു  
Visum Expresso ട്വിറ്റെർ അക്കൗണ്ട് ഫോലോ ചെയ്യാൻ   ക്ലിക് ചെയ്യു  

cm pinarayi vijayan on k rail project in cpm party congress