JavaScript is not available.

ഹൈദരാബാദ്: പതിനേഴുകാരിയെ കൂട്ടബലാത്സംഗം ചെയ്ത സംഭവത്തിന്റെ ഞെട്ടൽ മാറുന്നതിന് മുൻപ് ഹൈദരാബാദ് നഗരത്തില്‍ നാല് പെണ്‍കുട്ടികള്‍ കൂടി പീഡനത്തിനിരയായി. നഗരപരിധിയിലെ വിവിധ പോലീസ് സ്‌റ്റേഷനുകളിലാണ് പ്രായപൂര്‍ത്തിയാകാത്ത പെണ്‍കുട്ടികളെ പീഡിപ്പിച്ചതിന് നാല് വ്യത്യസ്ത കേസുകള്‍ റിപ്പോര്‍ട്ട് ചെയ്തത്. പതിനേഴുകാരിയെ കൂട്ടബലാത്സംഗം ചെയ്ത സംഭവത്തില്‍ പ്രതിഷേധം ആളിക്കത്തുന്നതിനിടെയാണ് തൊട്ടടുത്ത ദിവസങ്ങളിലും പുതിയ പീഡനക്കേസുകള്‍ രജിസ്റ്റര്‍ ചെയ്തിരിക്കുന്നത്.

സുല്‍ത്താന്‍ഷാഹിയില്‍ മുത്തശ്ശിയുടെ വീട്ടിലേക്ക് പോയ 12 വയസ്സുകാരിയെയാണ് ടാക്‌സി ഡ്രൈവറും മറ്റൊരാളും ചേര്‍ന്ന് പീഡിപ്പിച്ചത്. മേയ് 31-ാം തീയതി വീട്ടില്‍നിന്നിറങ്ങിയ പെണ്‍കുട്ടിയെ പിന്നീട് കാണാതായിരുന്നു. പോലീസ് നടത്തിയ അന്വേഷണത്തില്‍ പിറ്റേദിവസം സുല്‍ത്താന്‍ഷാഹിയില്‍നിന്നാണ് പെണ്‍കുട്ടിയെ കണ്ടെത്തിയത്. തുടര്‍ന്ന് പെണ്‍കുട്ടിയില്‍നിന്ന് മൊഴിയെടുത്തതോടെയാണ് പീഡനവിവരം പുറത്തറിയുന്നത്. ഇതോടെ പോലീസ് കേസെടുക്കുകയും ടാക്‌സി ഡ്രൈവറായ ഷെയ്ഖ് കലീം അലി, മുഹമ്മദ് ലുഖ്മാന്‍ അഹമ്മദ് യസ്ദാനി എന്നിവരെ പിടികൂടുകയും ചെയ്തു. പെണ്‍കുട്ടിയെ കാറില്‍ കയറ്റിയ ടാക്‌സി ഡ്രൈവര്‍ പിന്നീട് സുഹൃത്തിന്റെ വീട്ടിലേക്ക് കൂട്ടിക്കൊണ്ടുപോവുകയും ഇവിടെവെച്ച് രണ്ടുപ്രതികളും കുട്ടിയെ പീഡിപ്പിച്ചെന്നുമാണ് പോലീസ് പറയുന്നത്. തുടര്‍ന്ന് പിറ്റേദിവസം രാവിലെ സുല്‍ത്താന്‍ഷാഹിയിലെ റോഡരികില്‍ പെണ്‍കുട്ടിയെ ഉപേക്ഷിച്ച് പ്രതികള്‍ കടന്നുകളയുകയായിരുന്നു.

കാലാപഥാര്‍ പോലീസ് സ്‌റ്റേഷന്‍ പരിധിയിലാണ് മറ്റൊരു പീഡനക്കേസ് റിപ്പോര്‍ട്ട് ചെയ്തിരിക്കുന്നത്. കടയില്‍ ജോലിചെയ്തിരുന്ന പെണ്‍കുട്ടിയെ 21-കാരന്‍ പീഡിപ്പിച്ചെന്നായിരുന്നു പരാതി. പെണ്‍കുട്ടിക്ക് വയറുവേദന അനുഭവപ്പെട്ടതോടെയാണ് പീഡനവിവരം പുറത്തറിഞ്ഞത്. ഈ കേസില്‍ പ്രതിയായ മുഹമ്മദ് സൂഫിയാനെ പോലീസ് പിന്നീട് അറസ്റ്റ് ചെയ്തു.

ഏപ്രില്‍ 22-ന് രാംഗോപാല്‍പേട്ട് പോലീസ് സ്‌റ്റേഷന്‍ പരിധിയില്‍ നടന്ന ലൈംഗികപീഡനത്തിലും കഴിഞ്ഞദിവസമാണ് കേസെടുത്തത്. അനാഥാലയത്തിലെ അന്തേവാസിയായ 16-കാരിയെ പീഡിപ്പിച്ചെന്ന കേസില്‍ ഫോട്ടോസ്റ്റാറ്റ് കടയിലെ ജീവനക്കാരനായ സുരേഷിനെ(23) പോലീസ് അറസ്റ്റ് ചെയ്തു. ഏപ്രില്‍ 22-ാം തീയതിയാണ് ഇയാള്‍ പെണ്‍കുട്ടിയെ ലൈംഗികമായി പീഡിപ്പിച്ചത്. പെണ്‍കുട്ടിയുമായി നേരത്തെ അടുപ്പം സ്ഥാപിച്ചിരുന്ന പ്രതി, ജന്മദിനം ആഘോഷിക്കാമെന്ന് പറഞ്ഞ് കുട്ടിയെ കൂട്ടിക്കൊണ്ടുപോവുകയും കാറില്‍വെച്ച് ലൈംഗികമായി ഉപദ്രവിക്കുകയുമായിരുന്നു. ഇയാള്‍ പെണ്‍കുട്ടിക്ക് നല്‍കിയ മൊബൈല്‍ ഫോണ്‍ കഴിഞ്ഞദിവസമാണ് അനാഥാലയ നടത്തിപ്പുകാരുടെ ശ്രദ്ധയില്‍പ്പെട്ടത്. തുടര്‍ന്ന് കാര്യങ്ങള്‍ ചോദിച്ചതോടെയാണ് പെണ്‍കുട്ടി പീഡനവിവരം വെളിപ്പെടുത്തിയത്.

പ്രായപൂര്‍ത്തിയാകാത്ത പെണ്‍കുട്ടിയെ സിനിമ തീയേറ്ററില്‍വെച്ച് പീഡിപ്പിച്ചതിന് രാജേന്ദ്രനഗര്‍ സര്‍ക്കിള്‍ പോലീസ് സ്‌റ്റേഷനിലാണ് മറ്റൊരു കേസ് രജിസ്റ്റര്‍ ചെയ്തിരിക്കുന്നത്. ഇതിലെ പ്രതിയും പ്രായപൂര്‍ത്തിയാകാത്ത ആണ്‍കുട്ടിയാണ്. ഒരുമാസം മുമ്പായിരുന്നു കേസിനാസ്പദമായ സംഭവം. നേരത്തെ പരിചയമുള്ള ആണ്‍കുട്ടിക്കൊപ്പം സിനിമയ്ക്ക് പോയപ്പോള്‍ തീയേറ്ററില്‍വെച്ച് ലൈംഗികമായി ഉപദ്രവിച്ചെന്നാണ് പെണ്‍കുട്ടിയുടെ പരാതി.

അതേസമയം, 17-കാരിയെ കാറില്‍ കൂട്ടബലാത്സംഗം ചെയ്ത സംഭവത്തില്‍ ഇതുവരെ നാല് പ്രതികളെയാണ് പോലീസ് അറസ്റ്റ് ചെയ്തത്. പ്രായപൂര്‍ത്തിയാകാത്ത മൂന്ന് പേരടക്കം അഞ്ചുപേരാണ് കേസിലെ പ്രതികള്‍. മേയ് 28-ാം തീയതിയാണ് പബ്ബില്‍നിന്ന് പാര്‍ട്ടി കഴിഞ്ഞ് മടങ്ങിയ 17-കാരിയെ പ്രതികള്‍ കാറിലിട്ട് കൂട്ടബലാത്സംഗം ചെയ്തത്. പബ്ബില്‍നിന്ന് പരിചയപ്പെട്ട പെണ്‍കുട്ടിയെ വീട്ടില്‍ വിടാമെന്ന് പറഞ്ഞ് ആഡംബര കാറില്‍ കയറ്റിക്കൊണ്ടുപോവുകയും ബലാത്സംഗം ചെയ്യുകയുമായിരുന്നു. യാത്രയ്ക്കിടെ പെണ്‍കുട്ടിയെ ആഡംബര കാറില്‍നിന്ന് മറ്റൊരു കാറിലേക്ക് മാറ്റി. തുടര്‍ന്ന് ബഞ്ചറഹില്‍സിലെ ആളൊഴിഞ്ഞ സ്ഥലത്തെത്തി കൂട്ടബലാത്സംഗത്തിനിരയാക്കുകയായിരുന്നു. പിന്നീട് രാത്രി 7.30-ഓടെയാണ് ഇവര്‍ പെണ്‍കുട്ടിയെ തിരികെ പബ്ബില്‍ എത്തിച്ചത്.

Four more rape cases reported after gang rape case in hyderabad