JavaScript is not available.

വർണ്ണാശ്രമങ്ങൾ എന്ന വാക്ക് നാം ചെറുപ്പം മുതൽ കേട്ടു വരുന്നതാണല്ലോ.അതിൽ ആശ്രമങ്ങളെ  നാലായി പിരിച്ച് ബ്രഹ്മചര്യം, ഗാർഹസ്ഥ്യം,വാനപ്രസ്ഥം, സംന്യാസം എന്ന് വിളിക്കുന്നു.വേദകാല ഘട്ടം മുതൽ നടപ്പിൽ വന്നതോഅതിനും മുൻപ് തന്നെ സ്വീകരിച്ചിരുന്നതോ ആണ് മനുഷ്യ ജീവിതത്തിലെ ഈ നാലു പ്രധാന ഘട്ടങ്ങൾ എന്നും പറയാം.
 
   ഒരു ശിശു തന്റെ ചുറ്റുപാടുകളെക്കുറിച്ച് ബോധവാനാകുന്ന ശൈശവാവസ്ഥ പിന്നിട്ട് എത്തുന്ന ബാല്യകാലത്ത് സ്വീകരിക്കുന്ന ആശ്രമമത്രെ ബ്രഹ്മചര്യം അത് അയാളുടെ യൗവന പ്രാരംഭ കാലം വരെ തുടരുന്ന ജീവിത കാലഘട്ടമാണ്.ഉപനയനം, സമാവർത്തനം, പഠനം എന്നിങ്ങനെയുള്ള കാര്യങ്ങൾ അനുഷ്ഠിക്കപ്പെടുന്ന കാലഘട്ടമാണ് ബ്രഹ്മചര്യം. അതിലെ നിഷ്ഠകളെക്കുറിച്ച് പല ഗ്രന്ഥങ്ങളിലും വിശദമാക്കപ്പെട്ടിട്ടുമുണ്ട്.

    ബ്രഹ്മചാരി വിവാഹമെന്ന ചടങ്ങോടെ ഗാർഹസ്ഥ്യമെന്ന ആശ്രമത്തിലേക്കു പ്രവേശിപ്പിക്കപ്പെടുകയായി. അതോടെ കുട്ടിത്തം പൂർണ്ണമായി മാറി ഉത്തരവാദിത്വ ത്തോടെ കുടുംബം നടത്തുകയും തന്റെ സംരക്ഷണ വലയത്തിൽ വരുന്നതിനെ എല്ലാം പരിപാലിക്കുകയും ചെയ്യേണ്ട ഭാരിച്ച ചുമതലയാണ് ഗൃഹസ്ഥന് ഉള്ളത്. ജീവിതോപാധി തേടുകയും അത് കുടുംബ പോഷണത്തിനായിഉപയോഗിക്കയും വേണം. 

   പഞ്ചയജ്ഞങ്ങൾ ആയ ബ്രഹ്മയജ്ഞം, ദേവയജ്ഞം, പിതൃയജ്ഞം, നൃയജ്ഞം, ഭൂതജ്ഞം എന്നിവ ഗൃഹസ്ഥന്റെ ചുമത ലകളിൽപെടുന്നു.താൻ വസിക്കുന്ന പ്രദേശത്തിന്റെയും ക്ഷേത്രങ്ങളുടേയും സന്യാസമഠങ്ങളുടേയും ഉന്നമനത്തിനും ഗൃഹസ്ഥൻ ഭാഗഭാക്കാകേണ്ടതുണ്ട്. ദേശത്തിന്റെയും സ്വന്തംകുലത്തിന്റേയും ഉന്നമനത്തിനായി സന്താനങ്ങളെ വളർത്തി
അവരുടെ ആശ്രമ ധർമ്മ പ്രകാരമുള്ള വളർച്ചയുടെ ബാദ്ധ്യതയും ഗൃഹസ്ഥനുണ്ട്.അതീവ ക്ലിഷ്ഠമായതും അതോടൊപ്പം ശ്രേഷ്ഠമായതുമാണ് ഗാർഹസ്ഥ്യം.

     മക്കളുടെ ഗൃഹസ്ഥാശ്രമം തുടങ്ങുന്ന തോടെ ഗൃഹസ്ഥൻ മൂന്നാമത്തെ ആശ്രമമായ വാനപ്രസ്ഥത്തിലേക്കു നീങ്ങാൻ പ്രാപ്തനാവുകയാണ്. ആദ്യത്തെ രണ്ട് ആശ്രമങ്ങളും അനുഷ്ഠിച്ച തൃപ്തിയോടെവേണം വാനപ്രസ്ഥത്തിലേക്കു പ്രവേശിക്കുവാൻ .സ്വയമേവ വിരക്തനായവൻ ശ്രേഷ്ഠനായ സന്യാസിയാവാൻ യോഗ്യനത്രെ. ധർമ്മസൂത്രത്തിലാണ് ആശ്രമ ധർമ്മങ്ങൾ പ്രതിപാദിക്കപ്പെട്ടിരിക്കുന്നത്. ആദ്യത്തെ രണ്ടാശ്രമങ്ങളായ ബ്രഹ്മചര്യവും ഗാർഹസ്ഥ്യവും സംബന്ധിച്ച വിവരങ്ങൾ ധാരാളം ലഭ്യമാണെങ്കിലും മൂന്നാമത്തെ ആശ്രമമായ വാനപ്രസ്ഥത്തെക്കുറിച്ചും അതിന്റെ ഘട്ടങ്ങളെക്കുറിച്ചും രീതികളെക്കുറിച്ചും പരിമിതമായ അറിവുകൾ മാത്രമാണ് പൊതുവെ സമൂഹത്തിൽ ഉള്ളത്.

    ഈ ഒരു കാര്യം മനസ്സിൽ കണ്ടു കൊണ്ടാണ് മുഞ്ചിറ മഠം മൂപ്പിൽ സ്വാമിയാർ പൂജനീയ ശ്രീമദ് പരമേശ്വര ബ്രഹ്മാനന്ദ തീർത്ഥർ, വൈയാസകി കിളിമാനൂർ സി. ആർ. കേരളവർമ്മ തമ്പുരാനോട് ഈ ഒരു ഗ്രന്ഥരചനയെക്കുറിച്ച് നിർദ്ദേശി ച്ചത്. സനാതന ധർമ്മത്തെ ആധുനിക കാലത്തിന് പരിചയപ്പെടുത്തിയ പുസ്തക രചനകൾ നടത്തിയ കേരള വർമ്മ തമ്പുരാൻ ആ നിർദ്ദേശം ശിരസാവഹിച്ച്എഴുതിയ വാനപ്രസ്ഥാശ്രമം എന്ന പുസ്തകം മൂന്നാമത്തെ ആശ്രമമായ വാനപ്രസ്ഥത്തെക്കുറിച്ച് വിശദമായി വിവരിച്ചതു കൂടാതെ യമ നിയമാദി  അഷ്ടാംഗയോഗത്തെക്കുറിച്ചും പറഞ്ഞിരിക്കുന്നു.

    കൂടാതെ നിത്യാനുഷ്ഠാനങ്ങളും ക്ഷേത്രോപാസനയും വിവരിക്കുന്നു, ക്രിയാ ഭാഗങ്ങളെയും , മന്ത്രങ്ങളേയും കുറിച്ചു മൊക്കെ വിവരിക്കുന്നുണ്ട്. അനുബന്ധങ്ങളായി പ്രധാന യോഗാസനങ്ങൾ ചിത്രസഹിതവും ഉണ്ട് . പ്രാണായാമക്രിയകൾ, ധ്യാനം എന്നിങ്ങനെ ഒരു മനുഷ്യന് സ്വജീവിതത്തിൽ സ്വസ്ഥനാവാനുള്ള വ ഴി കാട്ടിയായി മാറുന്നു ഈ പുസ്തകം.

    അതിബൃഹത്തായ പദ്ധതിയെ അത്യന്തം ലഘുവാക്കി നമുക്ക് മുന്നിലെത്തിച്ച ബഹുമാന്യ ഗ്രന്ഥകർത്താവ് വൈയാസ കിയെ അഭിവാദ്യം അർപ്പിക്കുന്നു. കൂടാ തെ അനുഗ്രഹ അവതാരിക എഴുതിയ മൂപ്പിൽ സ്വാമിയാർ ശ്രീമദ് പരമേശ്വര ബ്രഹ്മാനന്ദതീർത്ഥരുടെ പാദ പ്രണാമം ചെ യ്യുന്നു. അദ്ദേഹം പ്രത്യേക താൽപ്പര്യമെടുത്തതു കൊണ്ട് ഇങ്ങനെ ഒരു കൃതി മലയാളത്തിനു ലഭിച്ചു.

    ആശംസ നേരുന്ന ആദരണീയ ഡോക്ടർ വി.എസ് ശർമ്മ അവർകളുടെ ലേഖനവും പുസ്തകത്തിന് ചേരുന്ന അലങ്കാരം തന്നെ. പ്രിയപ്പെട്ട അപ്പു ഏട്ടൻ, ആദരണിയനായ പണിക്കത്ത് അപ്പു നമ്പൂതിരി സേവന രംഗത്ത് സ്വന്തം വ്യക്തി മുദ്ര പതിപ്പിച്ച ആളാണ് കൂടാതെ സനാതന ധർമ്മസംരക്ഷണത്തിനും ആദ്ധ്യാത്മിക കൃതികളിൽ ശ്രദ്ധ ചെലുത്തി അവയുടെ പ്രസിദ്ധീകരണ താൽപ്പര്യത്തോടെ സമ്പാദനവും  പ്രസാധനവും നടത്തുന്നു. അദ്ദേഹത്തിന്റെ ആശംസയോടും കൂടിയാണ് ഈ പുസ്തകം നമ്മളിലേക്കെത്തുന്നത്. 
      ഈ പുസ്തകം നമ്മുടെ പുസ്തക ശേഖരത്തിൽ ഒരു മുതൽക്കൂട്ടാണ്. സ്വസ്ഥജീവിതത്തിൽ താൽപ്പര്യമുള്ള ഏവരും വായിക്കേണ്ടതും വേണ്ടപ്പെ ട്ടവരെക്കൊണ്ട് വായിപ്പിക്കേണ്ടതുമാണ്. ഗുരുവന്ദനം .
ശങ്കരനാരായണൻ ശംഭു .

ഈ പുസ്തകം തപാലിൽ  VPP ആയി വേണ്ടവർ ചുവടെ ഉള്ള നമ്പറിൽ ബന്ധപെടുക . 

Panikkam Appu Namboothiri  +9185472 86111

Vanaprasthasram book review by Sankaranarayanan Sambhu