JavaScript is not available.

തിരുവനന്തപുരം : വർഗീയതയെ ചെറുക്കാൻ ഹിന്ദുത്വം പഠിക്കാനൊരുങ്ങി സിപിഎം. ദേശീയതലത്തിൽ തയ്യാറാക്കുന്ന പാർട്ടി ക്ലാസിനുള്ള കരിക്കുലത്തിൽ ഈ പഠനവും ഉൾപ്പെടുത്തും. ആർ.എസ്.എസിന്റെ പ്രവർത്തന രീതി, ഹിന്ദുത്വത്തെ രാഷ്ട്രീയമായി ഉപയോഗപ്പെടുത്തുന്ന പ്രയോഗരീതി എന്നിവയും സി.പി.എമ്മിന്റെ പാഠ്യപദ്ധതിയിലുണ്ടാകും. ആർ.എസ്.എസിനെയും ഹിന്ദുത്വത്തെയും സംബന്ധിച്ച് ‘ക്ലാസ് നോട്ടി’ന് അന്തിമരൂപം നൽകാനുള്ള ചുമതല പാർട്ടികേന്ദ്രത്തിനാണ്. പാർട്ടി അംഗങ്ങളുടെ സംഘടനാബോധവും രാഷ്ട്രീയ വിദ്യാഭ്യാസവും മെച്ചപ്പെടുത്തണമെന്നാണ് കേന്ദ്രകമ്മിറ്റിയുടെ വിലയിരുത്തൽ.

ആർ.എസ്.എസ്. എന്താണെന്നും അതിന്റെ പ്രയോഗരീതിയും തിരിച്ചറിഞ്ഞ് ജനങ്ങളെ ബോധ്യപ്പെടുത്തുകയാണ് പ്രതിരോധത്തിന്റെ ഒരുമാർഗം. അതിനാൽ പാർട്ടിവിദ്യാഭ്യാസത്തിന്റെ സിലബസ് പരിഷ്കരിക്കണമെന്നുമാണ് കേന്ദ്രകമ്മിറ്റി തീരുമാനിച്ചത്. ഇക്കാര്യങ്ങൾ എല്ലാ പാർട്ടിഘടകങ്ങളിലും റിപ്പോർട്ട് ചെയ്യുന്നുണ്ട്. പുതിയ സിലബസ് പഠിപ്പിക്കാനുള്ള സ്ഥിരം പാർട്ടി സ്കൂളായി ഡൽഹിയിലെ ഹർകിഷൻ സിങ് സുർജിത്ത് ഭവൻ പ്രവർത്തിക്കും.

പാർട്ടിയിൽ യുവാക്കളുടെ പങ്കാളിത്തം കൂടുന്നുണ്ടെങ്കിലും അവർക്ക് രാഷ്ട്രീയസംഘടനാ വിദ്യാഭ്യാസമില്ല. പുതിയ ചെറുപ്പക്കാരായ മുഴുവൻ പ്രവർത്തകരെയും പാർട്ടിക്ലാസിന്റെ ഭാഗമാക്കണമെന്നാണ് നിർദേശം. അവർക്ക് പ്രത്യയശാസ്ത്രപരവും രാഷ്ട്രീയവുമായ പരിശീലനം നൽകണം. അത് ഹിന്ദുത്വം എന്താണെന്നും ആർ.എസ്.എസ്. എങ്ങനെയാണ് അതിനെ ഉപയോഗിക്കുന്നതെന്നും വിശദീകരിച്ചുകൊണ്ടാകും.

എല്ലാ രാഷ്ട്രീയസംഭവങ്ങളിലും നയപരമായ വിശദീകരണം പാർട്ടികേന്ദ്രം നൽകും. ഹിന്ദിമേഖലയിൽ പാർട്ടി കേഡർമാരുടെ ഗുണനിലവാരം മെച്ചപ്പെടുത്താനുള്ളതാണ് മറ്റൊരു തീരുമാനം. ഇതിനായി ഹിന്ദി ഭാഷാപ്രദേശങ്ങളിൽ സ്കൂൾ നടത്താനും തീരുമാനിച്ചു. ഇവിടെ പരിശീലനം നേടുന്നവർ കേഡർമാരിലേക്ക് രാഷ്ട്രീയവിദ്യാഭ്യാസം പകരാനുള്ള ചുമതലക്കാരാകും.

CPM plans to study Hinduism to fight communalism