JavaScript is not available.

കേന്ദ്ര സർക്കാരിന്റെ കീഴിലുള്ള പ്രസാദ് (PRASAD) പദ്ധതിയിൽ ഉൾപ്പെടുത്തി ഗുരുവായൂരിൽ ഒരു സാംസ്‌കാരിക സമുച്ചയം പണിയണമെന്ന് ഗുരുവായൂർ മാടമ്പ് കുഞ്ഞുകുട്ടൻ സുഹൃത് സമിതി ആവശ്യപെട്ടു. മേൽപ്പത്തൂർ, വില്വമംഗലം, മാനവേദരാജ, പൂന്താനം എന്നീ ഭക്തപ്രതിഭകളുടെ സാന്നിദ്ധ്യം ഗുരുവായൂരിന്റെ വളർച്ചയിൽ ഗണ്യമായ പങ്കുവഹിച്ചിട്ടുണ്ട്. പിൽക്കാലത്ത് എഴുത്തുകാരും, ചിത്രകാരന്മാരും, സംഗീതജ്ഞരും, കവികളുമായ  കെ ദാമോദരൻ, പി കുഞ്ഞിരാമൻ, യൂസഫ് അലി കേച്ചേരി, പുതൂർ ഉണ്ണികൃഷ്ണൻ, വള്ളുകപ്പുള്ളി കൃഷണൻകുട്ടി നായർ, മാടമ്പു കുഞ്ഞുകുട്ടൻ, ജനാർദ്ധനൻ നെടുങ്ങാടി, ചൊവല്ലൂർ കൃഷ്ണൻകുട്ടി, എന്നിവർ അതിന്റെ തുടർച്ചയാണ്. ക്ഷേത്രത്തോടൊപ്പം വികസിക്കുന്ന അതിന്റെ കലാസാംസ്‌കാരിക മണ്ഡലങ്ങളെ വളർത്തി എടുക്കേണ്ടതുണ്ട്. അതിനായി  ഇന്ത്യയിലുള്ള മുഴുവൻ കലകളും അവതരിപ്പിക്കാവുന്നതും സാംസ്കാരിക പ്രവർത്തനങ്ങൾ നടത്താവുന്നതുമായ ഒരു സാംസ്കാരിക സമുച്ചയം ഗുരുവായൂരിൽ  ഉണ്ടാകേണ്ടത്  കാലഘട്ടത്തിന്റെ ആവശ്യകതയാണ്. 
യോഗത്തിൽ നാടക - സിനിമ സംവിധായകൻ എം.കെ.ദേവരാജൻ അദ്ധ്യക്ഷനായിരുന്നു. കവി സുധാകരൻ പാവറട്ടി, പക്ഷി നിരീക്ഷകൻ സി.പി.സേതുമാധവൻ,  ജയപ്രകാശ് കേശവൻ, കൃഷണനാട്ടം കളിയോഗം ആശാൻ (റിട്ട) കെ സുകുമാരൻ, ശ്രീകുമാർ ഇഴുവപ്പാടി, നാലപ്പാടൻ സ്മാരക - സാംസ്കാരിക  സമിതി സിക്രട്ടറി  ടി.കൃഷ്ണദാസ്, സജികുമാർ എം.കെ,  മനോഹരൻ തിരുനെല്ലൂർ, ഗംഗാധരപ്രസാദ്, ഹരി വെള്ളാപറമ്പിൽ, രാജൻ തറയിൽ എന്നിവർ സംസാരിച്ചു. പ്രസ്തുത  സാംസ്കാരിക സമുച്ചയത്തിന്റെ പ്രവർത്തന പദ്ധതി തയ്യാറാക്കി കേന്ദ്ര - സംസ്ഥാന ടൂറിസം മന്ത്രാലയങ്ങൾക്ക് നിവേദന രൂപേണ സമർപ്പിക്കുന്നതിന് എം.കെ.ദേവരാജൻ, ശ്രീകുമാർ ഇഴുവപ്പാടി, ജയപ്രകാശ് കേശവൻ എന്നിവരെ ഉൾപ്പെടുത്തി ഒരു സമിതിക്കു രൂപം കൊടുത്തു. ഈ പദ്ധതിയുടെ നിർവ്വഹണത്തിനായി ഗുരുവായൂർ ദേവസ്വം - നഗരസഭാ ഭരണസമിതികളെ നേരിൽ കണ്ട് അഭ്യർത്ഥിക്കുന്നതിനും യോഗം തീരുമാനിച്ചു.

മാടമ്പ് കുഞ്ഞുകുട്ടൻ സുഹൃത് സമിതിക്കു വേണ്ടി ജനറൽ സിക്രട്ടറി ശ്രീകുമാർ ഇഴുവപ്പാടി .

A cultural complex is needed in Guruvayur- Madamp Kunjukuttan Suhrit Samiti